Thursday, November 12, 2009

Liri e mediave apo liri e shprehjes

Rasti i rrahjes së Mero Bazes nga biznesmeni Taçi ka rindezur edhe një herë debatin mbi lirinë e mediave. Së fundi ka patur një debat të ashpër në emisionin Opinion i cili pati si jehonë dy peticione kundër njëri tjetrit, të firmosur nga qindra gazetarë, si dhe një numër shkrimesh.
Po përpiqem të shpreh mendimin tim lidhur me çka është thënë në këto debate nëpërmjet këtij shkrimi që e konsideroj si vazhdimësi të dy shkrimeve që kam botur së fundi në Korrieri me titujt "Mbi mizerabilitetin e mediave" dhe "Fenomeni Taçi"..

Gjykoj se ka një spekullim me termin "liria e mediave" kur kjo përdoret duke nënkuptuar lirinë e shprehjes. Janë dy gjëra të ndryshme, veçanërisht në Shqipëri. Mediat në Shqipëri nuk janë viktima, që kërkojnë të çlirohen, sikurse janë përpjekur shumë gazetarë, (dhe jo vetëm) t'i paraqesin ato në këtë debat duke identifikuar rrahjet e gazetarëve me rrahjen e mediave. Në Shqipëri viktima e vërtetë është liria e shprehjes, kurse çështja e lirisë së mediave është diçka tjetër, më e komplikuar, madje me kundërthënie të forta. Sepse mediat tek ne janë, fatkeqësisht, një nga shtyllat kryesore të sistemit të korrupsionit që është ngritur në Shqipëri, të cilin në shumë shkrime paraardhëse e kam quajtut "regjim mediatik" i cili, si çdo regjim, është shtypës edhe i lirisë së shprehjes.
Le ta shtjelloj çka dua të them duke u nisur nga debati mbi televizionin Klan (e jo vetëm) që u lakua pas Opinionit për shkak të dekaratave të Frangajt.
Çfarë është televizioni Klan? Sipas Bazes dhe mbrojtësve të tij është një instrument i pushtetit të Berishës. Sipas çka tha Erjon Velia në Opinion është një viktimë e pushtetit, si shumë media të tjera, sepse nuk mund të mbijetojë dot pa lidhjen apo pa i shërbyer atij. Sipas drejtorit Frangaj zgjedhja e Klan për të qenë me pushtetin është një zgjedhje editoriale ashtu siç është një zgjedhje editoriale ajo e Top Channel apo e News 24 për të mbështetur opozitën. Cila është e vërteta e gjithë këtyre televizioneve dhe e shumëve rreth tyre?
Sipas meje këto tre argumente nuk e përjashtojnë krejtësisht njëri tjetrin, por e vërteta e të vërtetave është ajo që e dimë të gjithë: këto media ose lindën si anekse të bisneseve të tjera të pronarëve të tyre, për t'i mbrojtur e zhvilluar ato duke shantazhuar politikën apo duke i shërbyer asaj ose u bënë të tilla gjatë rrugës. Kurse të ashtuquajturën gazetari e "liri shprehjeje", si material me të cilin punon media, ato e kanë përdorur në mënyrë selektive e abuzive për të shantazhuar politikën apo për t'i shërbyer asaj. Ky është thelbi i së vërtetës së tyre i zhveshur nga detaje dhe nga hipokrizia e shumë pronarëve e gazetarëve. Dhe mediat nuk mund të quhen kurrsesi viktima të pushteteve, siç tha Velia, sepse ato kanë pasur një rol aktiv në ngritjen e ruajtjen e këtij sistemi. Dhe jo vetëm televizioni Klan. Televizoni Top Channel apo New 24 e me rradhë janë edhe ato instrumente pushteti, por të pushtetit të opozitës e cila është ndërtuesja e këtij sistemi mediatik, pas vitit 1997, me protagonistë kryesorë Metën dhe Ramën më një anë dhe një numër biznesmenësh nga më të njohurit në vend më anën tjetër. Ato nuk janë, pra, të lira pasi ato janë të ndërvarura plotësisht me pushtetet që ato normalisht, po të ishin të lira, do të duhet të kontrollonin. Mjafton të kesh parasysh se mediave ashtu si dhe partive politike dhe bizneseve më të fuqishme nuk u dihen burimet e të ardhurave për të nxjerrë konkluzionin se bash tek kjo ndërvarësi e bashkëfajësi qëndron lidhja midis tyre.
Prandaj kur bëhet fjalë për dhunim ose favorizim të mediave këtë duhet ta kuptojmë në kontekstin e luftës për pushtet midis dy forcave politike ekonomike, instrumente të të cilave janë edhe mediat. E në këtë luftë ai më i forti, që zakonisht është ai që ka pushtetin qendror, fillon e dhunon tjetrin.
Në këtë kontekst po zhvillohet edhe konflikti i fundit lidhur me rrahjen e Bazes. Edhe Baze vetë nuk është thjesht një gazetar. Ai është edhe një pronar të cilit i janë prekur interesat nga pushteti politiko ekonomik që ka në krye Berishën. Që të jemi deri në fund të vërtetë duhet thënë se ai gëzoi disa privilegje në krye të herës, kur Berisha mori pushtetin dhe ia morrën ato me forcë kur filloi të kritikojë pushtetin. Shkaku i prishjes ende nuk është bërë i qartë as nga Baze as nga Berisha. Kryeministri ka heshtur (vetëm tani, dmth. shumë vonë për një juriste, e bija e tij ka deklaruar se prishja ka ardhur lidhur me shitblerjen e Temës ku Baze, sipas saj, i ka propozuar një skemë që mbante erë pastrim parash) kurse Baze ka pretenduar se prishja është bërë për të denoncuar mosmbajtjen e premtimeve nga kryeministri për të luftuar korrupsionin. As njëri as tjetri argument nuk janë bindës. Dyshimi se prishja është shkaktuar për pazare të prishura është shumë i fortë dhe kjo flet shumë për çka po përpiqem të shtjelloj. Edhe Baze, pra, sipas meje nuk ka arritur të bindë për principialitetin e kritikave të tij jo vetëm pse Berishës i ka mbështetur në të kaluarën bëma shumë më të rënda, por edhe sepse një luftë principiale kundër korrupsionit nënkupton goditjen e tij 360 gradë dhe jo përqendrimin në dy tre shënjestra dhe lënien jashtë të shumicës, e veçanërish të sistemit që e prodhon atë. Me këtë nuk dua të them se ai ka shpifur, siç akuzohet nga kundërshtarët e tij. Këtë mund ta provojë vetëm gjykata dhe vetë jam i prirur të besoj se më shumë se shpifja nervozon e vërteta. Por dua të them se ka goditur në mënyrë selektive, pra se ka përdorur të njëjtat metoda për të cilat akuzohet Berisha kur i thuhet se godet mediat në mënyrë selektive. Po kështu, këtë luftë Baze nuk do të mund ta bënte kurrsesi pa pasur një prapavijë politike dhe ekonomike sepse, thjesht si gazetar i pavarur, nuk do të mund ta mbante dot gazetën Tema as edhe një ditë të vetme. Dua të them, pra, se, në thelb të këtij konflikti, nuk kemi të bëjmë me luftën midis medias si "qen roje" të interestit publik më një anë dhe kërcënuesve të këtij interesi, cilëtdo qofshin ata, më anë tjetër, por me luftën midis dy pushteteve: pushtetit në rritje të Berishës dhe Metës e mediave pranë tij nga një anë dhe atij të Ramës dhe mediave pranë tij, që synojnë ripërmbysjen e kësaj situate, më anë tjetër. Nëse mund ta çoj pak më tej metaforën me "qenin roje" mediat tona, si të thuash, lehin për të ruajtur gardhin e pronarëve dhe politikanëve të lidhur me ta, çka do të thotë lehin në mënyrë selektive, sepse hajdutë të tjerë i lenë ta kalojnë gardhin pa problem.
Në këtë lloj lehjeje eksiston edhe një kod heshtjeje që Baze së fundi e ka shkelur. Sipas këtij kodi gazetarët kanë akuzuar politikanët e njëri tjetrit, por jo pronarët e njëri tjetrit. Sipas këtij kodi Sali Berishën, Edi Ramën, Ilir Metën mund t'i akuzosh sa të duash, por jo biznesmenët dhe veçanërisht jo pranarët e mediave që mbështesin ata. Ata duhet të jenë të lirë të kalojnë gardhin. Kështu teatri i gjoja demokracisë sonë funksionon në rregull; të parët bëjnë lojën e demokracisë në skenë, të dytët tërheqin fijet e lidhjeve korruptive në prapaskenë. Kurse në darkë, pas rënies së perdes, të dy palët bëjnë hesapin se sa kanë fituar nga spektatorët.
Ajo çka bije në sy sot, përtej elementit psikologjik të Bazes, i cili në këtë njëanshmëri është shquar edhe për përdorje të goditjeve nën bark, është se interesat e palëve në konflikt, ku janë përfshirë edhe gazetarët, po bëhen më të ashpra. Ndoshta për shkak të krizës ekonomike që ka varfëruar tryezën. Ndoshta për shkak të polarizimit të mëtejshëm të politikës shqiptare; (ekzistenca e LSI si një pol i tretë siguronte pak më shumë hapësira.); ndoshta për shkak se në krye të politikës kanë mbetur dy persona antropologjikisht të ngjashëm, që ëndërr finale kanë eliminimin e çdo kundërshtari. Ndoshta pse kjo është rruga e pashmangëshme e një diçkaje të ngritur keq që kështu është e dënuar të dështojë.
Dikush, në këtë pikë do të më thotë nëse është e drejtë të përdoret fjala "dështim" për këtë sistem mediatik. Pse të mos themi se kjo dialiktikë ndeshjeje e interesave të kundërta edhe për pushtet mund ta çojë përpara të vërtetën edhe lirinë e shprehjes? Në shkrimin paraardhës e kam pohuar edhe vetë, por duke shtuar dyshimin e fortë se " përvoja që kemi me akuzat e ndërsjellta të dy palëve, që "harrojnë" përgjegjësinë e tyre, nuk na ka çuar shumë përpara." Kam shkruar edhe për gazetari që "vret" të vërtetën nëpërmjet luftës së gjysëm të vërtetave. Për të kthjelluar këto dyshime më erdhi në ndihmë një shkrim i gazetarit italian Marco Travagliobn ribotuar pikërisht në gazetën Tema, mbi gazetarët me kurriz të drejtë dhe me kurriz të lakuar. Midis të tjerash Travaglio, duke folur për gazetarinë që i shërben njërës palë kundër palës tjetër thotë: "Është shumë më e mirë mungesa totale e informacionit sesa një shumicë e informacioneve gjysmake ose false." E më pas shton: "Duke bashkuar dy gjysëm të vërteta, nuk arrihet një e vërtetë. Arrihet një dopio gënjeshtër, e më keq akoma, duke bashkuar gënjeshtra të ndryshme, arrihet një gënjeshtër me fuqi të shumëfishuar."
Për mua kjo gazetari e gjysëm të vërtetave, ashtu sikurse edhe politika e gjysëm të vërtetave që pasqyron ajo, janë një alibi e fuqishme edhe për sistemin gjyqësor që akuzohet sot pse nuk vepron. Një gazetari e së vërtetës të plotë do të ndihmonte edhe një sistem gjyqsor së pavarur që do të ndëshkonte çdo krim kundër interesit publik dhe anasjelltaz një sistem gjyqsor i pavarur do të ndihmonte një gazetari të të vërtetave të plota.
Kjo historia e "gjysëm të vërtetave" ka filluar herët në mediat tona, shpejt pas lindjes së këtij sistemi mediatik që kemi sot. Një datë simbolike mund të ishte fushata e katarsisit të Nanos i cili pati mbështetje të fortë mediatike. Rezultatet dihen, në vend të katarsisit patëm shtim të pisllëkut. Sot, pas dhjetë vjetësh, nuk di të them nëse prej asaj kohe e këtej shprehja e lirë, si nevojë për të vërtetën e plotë, ka ecur përpara apo prapa. Kur shikoj gazetarët e rinj që ka prodhuar ky sistem, që tashmë nuk merakosen fare të kenë një të vërtetë të tyren, - por edhe shpinën gjithnjë e më të përkulur të të vjetërve, - them me siguri që ka bërë prapa në favor të gazetarisë së gjysëm të vërtetave. Dhe një nga shkaqet, sipas meje, është se gjatë këtyre viteve ky sistem është konsoliduar në kuptimin se klasa e politikanëve, biznesmenëve dhe gazetarëve që e ka ndërtuar atë është konsoliduar në pushtet. Me aq sa mund të flitet për konsolidim sepse rasti Baze tregoi gjithashtu edhe brishtësinë dhe kalbëzimin e këtij sistemi.
Dikush do të më thotë: këto i dimë, i ke thënë edhe herë tjetër, por puna është se si ta ndryshojmë këtë gjendje. Personalisht para katër vjetësh e kam paraqitur një projekt, të cilin ma hodhën poshtë me fjalë dhe me heshtje me veprime dhe mosveprime si mazhonranca e Berishës edhe opozita e Edi Ramës, edhe mediat e tyre. Sipas meje sepse ata ishin tashmë vetë sistemi i gjysëm të vërtetave apo i dopio gënjeshtrës që unë propozoja të prishej. Në ndonjë nga shkrimet pasardhës, duke ndjekur edhe debatin që po zhvillohet, do të përpiqem t'i artikuloj disi më mirë disa prej ideve të asaj kohe që më duket se mbeten aktuale, por edhe më të vështira për t'u realizuar sesa katër vjet më parë. (Korrieri, 12 nëntor 2009)

12 comments:

Anonymous said...

Fatos Bobi, Fatos Djali per shkrimet tuaja na mer malli.E di, e mora vesh, qe e ke zet kur te lavderojne e kur te shkruajne Ode. Po une do t´i them dy fjale: Shkrimi eshte shume i bukur, por me i bukur eshte ndermjetsimi, rrezatimi i besueshmerise qe percjell ne shkrimet t´uaja. Logjika e analizes, kenveshtrimi autentik i Juaji, qartesia e Juaj vjen deri te une si lexues tamam ashtu sic e keni dhe Ju ne koke (gje qe mungon te shume gazetare ku ne rradhe te pare ato nuk jane vete te qarte per ate qe shkruajne dhe percjellin mesazhe gjysmake ku me shume te ngaterrojne se te sqarojne) dhe une jam i mbushur dhe i armatosur me nje te vertete. Faliminderit

zodiac taurus said...

Nje analize e shume e mire. Pergjithsisht, kur maskarenjte rrihen, ulu, akomodohu dhe veshtroji.Eshte spektakli yt.

fjorent said...

I nderuar Z. Lubonja,

dikush ketu thote se i urreni lavdet (me te drejte kur mendon se sa shume deme i kane sjelle lavdet ndaj liderit shoqerise shqiptare) por nuk mundem te mos them se me te vertete jeni nje rreze shprese ne panoramen e zymte te shoqerise shqiptare (jo vetem te medias qe eshte pasqyre e denje e saj).

Tani le te kthehem tek artikulli. Ju shpreheni aq bukur e me nje logjike perfekte e duket se keni parasysh nje demokraci liberale si ato skandinave apo anglosaksone.

Por kur fqinji yne italian me nje demokraci mbi 60 vjecare perpelitet ne te njejtat dilema (ndonese jo ne nivelin absurd shqiptar) cfare mund te presim nga Shqiperia jone e mjere qe shtetin e saj te pare e ngriti e fundit ne rajon, qe qeverite e para nuk i zgjaten as 6 muaj sepse qytetaret e saj e kane karakterin lehtesisht te shitshem tek pruresi me i pare, qe nuk arriti te krijoje dot nje shoqeri funksionuese ne gati 100 vjet egzistence dhe qe me kultin e individit apo te kapoklanit legjitimoi diktaturen me te eger ne Europe? Cfare mund te presim nga mish mashi yne demokratik ku ish komunistet u vune ne krye te demokrateve e demokratet ne krye te ish komunisteve?

Nese kam mesuar nje gje ne Itali eshte veshtiresia e jashtezakonshme per te mbajtur ne kembe nje demokraci te vertete. Natyra njerezore qenka e tille qe i harron shume shpejt te keqiat qe ka kaluar. Fatkeqesisht mesdhetaret ne pergjithesi dhe shqiptaret ne vecanti jane injoruesit me te medhenj te gabimeve te tyre historike. Cfare mund te behet thoni ju ne kete shkrim per te cliruar median e per ta bere me te vertete te lire. Cfare mund te behet - shtoj une - per ta bere shoqerine shqiptare me te vertete te lire? Rruga eshte e njejte por e veshtire dhe padurimi qe na karakterizon si shqiptare na e ben akoma me te veshtire zgjidhjen e ngercit.

Na duhen me shumice njerez me integritet moral e me karakter te forte qe nuk mposhten nga forca e klanit. Na duhen njerez qe te shohin pak me larg se e nesermja duke pranuar edhe ndonje sakrifice sot. Si mund te arrihet kjo? Duke cliruar mendjet e roberuara me nje ilac te forte por me veprim te ngadalte: me ARSIMIM. E vetmja shprese jane ata mijera qe sakrifikojne e studiojne jashte e qe nje dite do te behen ajo mase kritike qe do te thyeje rrethin vicioz. Deri sa ajo dite te vije shkrime si keto te tuajat shpresoj se do ta mbajne ndezur ate driten e shpreses per ata shqiptare (ndoshta pak sot, me shume neser dhe shumice pasneser) qe do te kuptojne se demokracia e vertete nuk mund te shitet per nje vile ne bregdet.

Tek e fundit shpresa vdes e fundit.

Gjithe te mirat

Anonymous said...

fatos
kam ca pyetje ne vend te komentit per teorine e lirise sipas teje.
merua eshte gazetar apo pronar
merua perballe berishes thote te verteta apo te pa verteta
kontraditat e pislleqeve mund te prodhojne gazetari te lire
a mund te kete gazetari te pavarur ne kapitalizmin shqiptar
ti kerkon ndihme nga ata qe mbajne ne kembe sistemin mediatik paradoks apo iluminizem i linndur ne spac
ti vete ke perfaqson vetvehten pushtetin apo opoziten
fatos ti ke nje kontradite te cilen vazhdon te mos e kuptosh.
kjo kontradite quhet shqiperi dhe duke mos kuptuar kete thur teorira per lirine relative ne nje roberi apsolute.
duhet te kuptosh thjeshtnevojen e te jetuarit brenda llojit
ne shqiperi lloji qe perpiqet te mbizoteroje eshte e keqja dhe pikerisht nga kjo perplasje fitimtare dalin me te keqinje dhe spirali vashdon e vashdon
fatos mua me pelqen qe ti enderon per te bere nje media te mrekullueshme por kjo ndodh vetem ne endrrat etua dhe jam i bindur se ato nuk mund te na marre kurush se nuk ju duhen
politikanet tane i bejne endrrat realiter me votat tona dhe ne jetojne relitetin tone me enddrat per tu bere te gjithe politikane gazetare teoriciene doktore shkencash
por nuk jemi aq te liq sa duhet per llojin e tyre
dhe une pres fatosin te shkruaje artikullin e radhes qe pasqyron me se miri kontraditen e mendjes me realitetin e cila pjell enddra me sy hapur.
mos harroj merua eshjte tullac apo e rruan per mode

Anonymous said...

Zoti Lubonja..

Me vjen keq por ato syzet i nderron kur flet per opoziten.. Ne aresyetimet e tuaj paksa te zgjatura perdoret gjithmone optika se edhe "ata edhe keta" njelloj jane.. Po patjeter sepse jane shqipetare jo nordike..

Por eshte e pandershme te flasesh me kete llogjike dhe harron se njeri krah beri edhe 1997(apo ke ndryshuar mendim?)...

Dhe sic po duket zgjedhjet u fituan nga ajo pale qe kishte militantet me te dhunshem... Por natyrisht juve nuk merreni me kete(sepse ndonje fjale e mire mund te thuhej per Ramen ketu).. por duroni perdhunimin verbal te Frangajt tek Klani..

Qe te jesh i pavaruar duhet te jesh natyrshem ne oponence me pushtetin por sic duket ai kolltuku i Klan qenka shume i ngrohte..

Pozicionimet ektreme politike te Klan nuk krahasohen me ato te Top Channel dhe News 24.

Po si mund te krahasohen interesat qe mbajne Klanin ne kembe me ato te gazets Tema? Juve e dini me mire se cfare buxhetesh fantastike menazhohen aty...

Por kjo nuk ju pelqen juve sepse ju duket sikur te pavarurit jane aty afer Fevziut...

Mero Bazen mund ta kritikosh sa te duash por ne fund te fundit Ai i sherben interesit publik ndersa juve jeni thjesht pjese e atij mekanizmi zhurmues...

Por te nenkuptosh qe Merua u dhunua sepse po luftonte per interesat e tij si botues(dhe jo gazetar) eshte njelloj sikur te thuash qe ne futboll nuk mund te jesh edhe lojtar edhe trainer (se per ndryshe ha drurin ...)

Sa per sqarim .. une jam ne Angli por nuk shoh asnje gazetar te pavarur qe te mos irritohej nga ajo fushate e turpshme (kriminale madje) elektorale dhe te mos flasesh per hapjen e kutive...

Ne kushtet ku kutite e votimit nuk hapen cdo gje ka humbur kuptimin.. por sic duket paska shume njerez qe s'duan te kuptojne te verteten...

Anonymous said...

Zoti Lubonja,a mund tu bej nje pyetje?
Une e ndaj analizen qe beni ju,po nuk arrij te kuptoj pse ju gjithmone mundoheni tja veshni te majtes dhe Edi Rames te keqijat dhe jo me shume Berishes i cili per mendimin tim eshte MISHERIM I TE KEQES.Me gjithe SISTEMIN KORRUPTIV per kapjen e shtetit siç thoni ju une mendoj se PD u ka sjelle shqiptareve shume here me te keqija se PS.Permendim ketu regjimin policor te 92-97,vjedhjen e parave ne 96,rrahjen e deputeteve socialiste ne 96,kontrabanda e naftes me Milo Gjukanovic,grushtin e shtetit te 98,perhapja e armeve ne 97 qe tani po i vret shqiptaret per nje llaf goje,urrejtja jug-veri,deri sa vijme te shitja e kufirit,Gerdeci,vrasja e Kosta Trebickes,HEQJA E PUNOJESVE ME TE THJESHTE NGA PUNA PER BINDJE POLITIKE NAG 92-97,2005-DERI TANI,vjedhjet skandaloze rruga Durres Kukes,Fazlliçi etj.A mendoni se brenda pandershmerise se tyre Ps-ja eshte
me e ndershme se PD-ja?Pse ju nuk thoni se ardhja e PD-se ne pushtet eshte vetem nje marreveshje e Nanos me Berishen po thoni se PD-ja ka fituar kur dihet mire se kjo parti nga 92-shi i ka humbur te gjithha zgjedhjet ne numer votash,kujto 2005 dhe 2009,gati 200.000 vota me pak?Pse elektorati i PD eshte me njerez pa shkolle,dhe pa ndryshim fare si ne pozite dhe ne opozite?A mendoni se Ps eshte zgjedhje me e mire per shqiptaret, e keqja me e vogel?A ju ben pershtypje se Saliu nga 2005 e tani ka bere vjedje me skandaloze se PS-ja kur keta te fundit i thirri me emer dhe mbiemer si hajdut dhe pastaj nuk hapi asnje dosje?Ju lutem,me ktheni pergjigje po mundet.Ju faleminderit

Anonymous said...

Mund ta kuptoj kendveshtrimin tuaj, por nuk jam dakord.
Se pari me duket pak patetike te besosh se ne nje vend te lire mediat flasin se bejne punen e tyre. Ne nje pjese te madhe rastesh ne boten e lire, lajmet me agresive vine si pasoje e perplasjeve te interesave. kjo eshte demokracia, kjo eshte normale shume mire qe ndodh edhe ketu.
Se dyti, perpjekja per paralele kudo dhe gjithhere mes pozites e opozites eshte e pavend. Me vjen keq qe nuk gjeni kurajon dhe qetesine e nevojshme per te kapercyer erresimet personale. Kam vite qe ndjek shkrimet tuaja, me duhet te them se obsesioni me Ramen ka ndikuar ne cilesine e shkrimeve. Ne kendveshtirmin tim, ne nje terren te varfer analsitesh ju ishit i vetmi qe prodhonit ndonje ide, por kjo po eklipsohet nga perpjekja artificiale per te futur Ramen ne cdo shkrim.
Gjykoj se pergjigja e Baazes sot eshte mjaft me vend. Me vjen keq por ju duhet tu thoni njerezve te verteten qe shte cilesia e tmerrshme e qeverisjes se sotme.
Faleminderit.

Anonymous said...

Z. Lubonja
Lexoj përgjithësisht 2 gazeta, Tema dhe Korrieri, vetëm për të lexuar editorialët e Mero Bazes dhe tuajat.
Nuk shoh TV, përveçse kur kap rastësisht bisedë te Klani ku jeni ju dhe Faktorin plus në Vizion+.

Jam krejt dakort që në Shqipëri ka probleme liria e të shprehurit, jo liria e medias.

Liria e medias është me pashë, mjafton të shohësh media të tëra të vëna në favor të një personi.
Media Klan (TV Klan, Koha Jonë) - i pari, doli të mbronte Mediun pas Gërdecit, Pangon pas seks-skandalit, Taçin pas drurit të Meros.
Dhe kjo nuk më dulet politikë editoriale. Kjo më duket evazion fjalësh për të çoroditur publikun.

Lexova një koment, këtu, për maskarenjtë kur rrihen që u dashka dalë për të bërë sehir.

Ka pak burime të së vërtetës, ose aspak. Momentalisht, e vërteta që buron nga Mero është e vetmja që kemi. Sepse nuk presim të na i zbulojë fijet e korupsionit Fevziu.
Larg qoftë të hajë as dru, se i rrudhen kostumet firmato.

A ka qenë apo është Mero burrë i keq, tip mistrec, etj?
Mbase. Por ne kemi nevojë për të vërtetën (ajo nervozon, thoni ju), jo për burra të mirë. Burrat e mirë janë në emigracion duke punuar për të mbajtur familjen.

E vërteta, nuk ka rëndësi nga cila gojë del, mjaft që të jetë e vërtetë. Dhe Tema, ëshët vendi i fundit ku mund të mësojmë akoma të vërtetën për mafian në pushtet.

Kam frikë, nga dëshira për të qenë "immpecabile" ju keni kaluar shumë teorik së fundmi. Vazhdoj t'ju lexoj me ëndje. Por kemi nevojë për më shumë të vërteta, e për më pak supozime.

Dhe e fundit, preferoj t'ju shoh më shumë në studion e Faktori+ sesa në Opinion.
Ju nuk keni pse i shërbeni si çertifikatë pastërtie një emisioni ku lejohen edhe qentë të lehin (Frangaj), mjaft të shurdhojnë të vërtetën (Tema).

"1984"

Anonymous said...

Z. Lubonja, me keqardhje verej largimin perdite e me shume tendin nga parimet e lirise se medias dhe se mendimit gjithashtu dhe gjetjes medeomos se nje shkaku per tu bere me pushtetin..

lavdrim said...

I nderuari lubonja,
Vazhdoni keshtu ne zhbirimet e nje realiteti qe ka sjelle vendin ne nje gangrene mendore, ngase politika dhe media jane qeni e qaforja e pushtetit te ralles. sa me shume lirohet zingiri aq me shume kuiset, por sa vjen padroni per te dhene buke te gjithe e dredhin bishtin simado.

ju pershendes
edhe nje here tjeter vazhdoni keshtu...

Anonymous said...

Po ju jap disa shkrime te z Lubonja ku ai kritikon qeverine aktuale dhe kasten politike ne teresi. meqe e akuzoni si te fikesuar vetem kundra Rames.

http://perpjekja.blogspot.com/2009/11/mbi-kufirin-detar-dhe-jo-vetem.html (mbi kufirin detar)

http://perpjekja.blogspot.com/2009/10/mbi-doreheqjen-e-bojaxhiut-dhe-jo-vetem.html (mbi doreheqjen e Bojaxhiut)
http://perpjekja.blogspot.com/2009/10/demagogjia-me-vizat.html
(demagogjia me vizat)
http://perpjekja.blogspot.com/2009/09/do-qeverise-berisha-me-mire.html ( a do qeverise me ire Berisha?)
http://perpjekja.blogspot.com/2009/08/krimi-i-pandeshkuar-qe-vret.html (krimi i pandeshkuar qe vret)
http://perpjekja.blogspot.com/2009/07/nje-koment-per-zgjedhjen-e-lsi.html (koment pr zgjedhjen e LS-ise)

Kuptohet ka dhe plote e plote shkrime te tjera. por mendoje se kjo mund te mjaftoje per ata qe lexojne me mendie te hapur. Dhe per sa i perket ceshties se mediave neper boten perendimore. Nuk paralelizohen problemet qe ata kane ne lidhje me lirine e mediave me rastin tone. le te marrim rastin me te afert ate te mediave Italiane. ndonese nje pjese e mire e tyre jane nen kontrollin Berluskonit apo mafias, prape se prape nuk mund te thuash qe ndodhen ne nje regjim berluskonian, sepse ekzistojne media te pavaruara, ndersa Shqiperia duke qene nje vend i vogel dhe me institucione gjoja te pavarura na bene te kuptojme qe eshte me e veshtire te kete media te pavarura. Dhe per ata qe e akuzojne Lubonjen per enderrimtar le te lexojne shkrimin e tij "krimi qe vret" dhe ndoshta do te kuptojne nese ai kerkon nje realitet utopik apo nje realitet normal. G. LL

Anonymous said...

Jeni profili me origjinal i gazetarise shqiptare. Vete fjala profil ndermjetson imazhin e te skalitures dhe Ju jeni i skalitur ne profesionin tuaj si gazetar, si njeri i letrave me nje kualitet te vecante qe nuk e gjen ne gazetare te tjere. Nuk e gjene ne gazetare te tjere e thene cope se ato nuk kane formimin tuaj, nuk kane formimin tuaj profesional dhe qytetar. Shkalla Juaj e perceptimit dhe kendveshtrimit te gjerave nuk eshte amatore jo qe jo (gje qe e gjen me shumice ne shume gazetare e gazeta) qe vetem rrapellejne dhe luajne me emocionet dhe qe injektojne dhe ndermjetsojne me dashje dhe pa dashje agresivitet dhe te keqen. Shkalla e Juaj e kendveshtrimit dhe e trajtimit nuk eshte vetem ajo e nje gazetari te talentuar qe e ka profilizuar vehtveten ne rrugetimin profesional te gazetarit ne shume prova te dukomentuara me qendrimin e vet, ( mjafton titulli shume domethenes "Perpjekja" dhe lenda qe ka brenda ajo) po shkalla e Juaj eshte ajo e nje mendimtari gazetar qe ka nje logjike tjeter nga mediokria, qe percjelle, rrezaton dhe ndermjetson mesazhe qytetare bashkekohore.